رب زولجلال . پنجابی حمد باری تعالی۔ نجمہ مسعود
اے رب زولجلال نہیں تیری کوئی مثال
کلا سب دا رب اے توں ھور نہ کوئی دوجا
متھے ٹیکاں سجدے دیواں کراں تیری پوجا
بڑے ھی توں رعب والا ڈھڈا تیرا جلال
تیرا ھی میں بندا واں رو رو منگاں دعاواں
ہتھ چکاں تر لے پاواں ھوکے نالے ھاواں
عاصیاں نوں بخش دینڑا بس تیرا ھی کمال
ندامتاں دا بوجھ اے چوکھا آوے نہ قرار
مینوں تے توں بخش دے ربا کریں نہ انکار
بے مقصد ایتھےنس نس کیتی جندڑی بےحال
جھوٹے نکلے سارے رشتے دن رات جناں تے لایا
کم سی اودی عبادت کرنا جیڑا دنیا تے لہیایا
کوئی نہ تکے میرے ول نہ کوئی پچھے حال
من کے اپنی دل دی مرضی لکھاں پاپ کمائے
فیر آپے معصوم بنڑ کے ابلیس دے ناں لائے
دین دنیا دی بھلائی دے ربا کردے توں نہال
اول وآخر تیری خوبی ظاھر وباطن چے توں
ساری دنیا تیری مِلک اندر توں اے باھر توں
پتا وی کوئی ھل جاوے کسی دی کی مجال
اے رب زولجلال نہئیں تیری کوئی مثال
تبصرے