ھراسانی دا قانون. پنجابی کالم نجمہ مسعود
ہراسانی دا قانون
گھر توں دفتر تک دا رستہ ویہ منٹ تے
تکن والیاں اکھاں ویہ ھزار
باپ تے پیو والی نظر تے بس
گھر دی دہلیز تک ھی رہ جاندی اے
پیراں تو شروع ھونڑ والی نظراں دی چھبن
دا زھر روز ھی پینڑا پیندا اے
انہاں لکھاں ماواں نوں جیڑیاں اپنے پریوار
دے پیٹ دا دوزخ بھرن دی فکر چے
انا نوں گھر دے کسی کونے تےرکھی
چینک دے اندر رکھ کےسر تے چنی دا کونا
سٹیا دوڑ کے بس تے چڑھن دی کوشش چے
کنڈیکٹر دی کہنی لگن دی فکر توں بے نیاز
اڈ کےسیٹ تے جا ڈگدی اے کنڈیکٹر دی اکھاں دی
مستی دا مزا پچھلیاں سیٹاں تے بیٹھے اودے سارے ھمزاد لیندے نے
فٹ ہاتھ تے چلدی کچی عمر دی کڑی
مرداں دی نظراں توں بچن لئی اک ہتھ نال بستہ
تے دوجے نال چنی سنبھالن دے چکر چے
لڑکھڑا جاندی تے سکول دے گیٹ تے اپڑن تک نظراں دے تیراں نال
گلنار چہرہ زخمی زخمی ھو جاندا اے
آفس جاندیاں کڑیاں تے عورتاں رستے چے دو چار مرداں دیاں
پھبتیاں پچھے ٹرن والے وھلے منڈیاں دیاں آوازاں تے بے نیازی دی ایکٹنگ کردیاں ھویاں لنگ جاندیاں نے کیوں کہ اے اونہاں لئی
کوئی نویں گل نہیں روز دا ھی تماشا اے
نواں قانون پاس ھویا عورت نوں کوئی ھراسان نہیں
کر سکدا نہ سڑک تے نہ سکول تے نہ ھی کسی دفتر چے مگر اے روزمرہ ھونڑ والے واقعات نوں کی کہواں دفتر چے فائل پکڑاندیاں ہتھ ٹکرا جانڑاں کولوں لنگدیاں ھولی جئی ہتھ مار جانڑا ٹکرا کے کولوں لنگ جانڑا رش چے ٹردیاں ھوئے جان بوجھ کے نالوں جڑ کے لنگ جانڑا اے سب کی اے اصل ھراسانی تے اے ھی اے ایدھی شکایت کس دفتر یا کس تھانے وچ لکھوائی جاوے کدوں اس ھراسانی توں نجات ملے گے بلکہ اینج کہوو کدوں انہاں حرکتاں نوں ھراسانی دے قانون دے وچ شامل کیتا جاوے گا
تبصرے